உங்கள் குழந்தைகளை புத்திசாலிகளாக வளர்க்க இந்த இரண்டு செயல்களை மட்டும் செய்யுங்கள்..! அப்புறம் பாருங்கள் அவர்களது பாய்ச்சலை..!!

முந்தைய தலைமுறை மண்ணில் புரண்டு விளையாடி, ஆற்றில் குளித்து, குளத்தில் நீந்தி, மரத்தடியில் கூட்டாஞ்சோறு சமைத்து வளர்ந்தது. நாகரீகம் மிகுந்து சொகுசு மலிந்திருக்கும் இந்த காலகட்டத்தில் குழந்தைகள் வீட்டை விட்டு வெளியே வருவதே பாதுகாப்பற்றது என்ற சூழல் உள்ளது. 

மாநகரங்களில் இருக்கும் பள்ளிக்கூடங்களில் மைதானங்களே இல்லை! தன் நாளில் பெரும்பகுதியைக் கழிக்கும் பள்ளிகளே வகுப்பறைகள் மட்டும் இருக்கும் சிறைச்சாலைகள் போல இருந்தால் அந்த பிள்ளைகள் எங்கே விளையாடுவார்கள், எப்படி ஆரோக்கியமாக வளர்வார்கள்..? 

புத்திசாலிக் குழந்தைகள் குறித்த புதிய ஆய்வு..!

கிழக்கு பின்லாந்து பல்கலைக்கழகத்தில் உள்ள நரம்பியல் விஞ்ஞானிகள் , சமீபத்தில் 6 முதல் 9 வயதுக்குட்பட்ட 504 குழந்தைகளிடம் இரண்டு ஆண்டுகள் ஆய்வு செய்தனர் .

குழந்தைகளை புத்திசாலித்தனமாக வளர்க்க விரும்பும் பெற்றோர்கள் அவர்களை மைதானங்களில் விளையாட அனுமதிக்க வேண்டும். வீடியோ கேம்களை கீழே வைத்துவிட்டு புத்தகத்தை எடுக்கவைக்க வேண்டும் என்று இந்த புதிய ஆய்வு தெரிவிக்கிறது.

விளையாட்டும் புத்திசாலித்தனமும்..!

விளையாட்டுக் குழுக்களில் அதிக நேரம் விளையாடுவதற்கு செலவழித்த குழந்தைகள், பெற்றோர்களால் மேற்பார்வை செய்யப்படாத கணினி விளையாட்டுகளில் கவனம் செலுத்தும் குழந்தைகளைக் காட்டிலும் சிறந்த சிந்தனைத் திறனை வளர்த்துக் கொண்டனர் என்பதை ஆராய்ச்சியாளர்கள் கண்டறிந்தனர்.

குறைந்த கொழுப்புள்ள பால் பொருட்கள் மற்றும் குறைவான சிவப்பு இறைச்சி ஆகியவற்றைக் கொண்ட ஒரு பாரம்பரிய ஆரோக்கியமான உணவுடன் கூடுதலான விளையாட்டு மற்றும் வாசிப்பு நேரத்தை இணைத்தபோது சிறந்த முடிவுகள் கிடைத்தன.

சரியான உணவும் விளையாட்டும்..!

″மேம்படுத்தப்பட்ட உணவுத் தரம் மற்றும் கூடுதல் நேரம் விளையாட்டு மற்றும் வாசிப்பு ஆகியவை மேம்பட்ட அறிவாற்றலுடன் தொடர்புடையவை” என்று நரம்பியல் விஞ்ஞானிகள் தெரிவிக்கின்றனர்.

ஆய்வின் கண்டுபிடிப்புகளில் ஒரு குறிப்பிட்ட பகுதி தனித்து நிற்கிறது: அதாவது, விளையாட்டுகள் போன்ற உடல் செயல்பாடு குழந்தைகளின் அறிவாற்றல் திறன்களை மேம்படுத்தும். மேலும், விளையாட்டானது  மேம்பட்ட மூளை செயல்பாடு, நினைவாற்றல் மற்றும் கற்றல் திறன் ஆகியவற்றுக்கு இடையே தெளிவான தொடர்பைக் காட்டியது .

தேசிய சுகாதார நிறுவனங்களின் கூற்றுப்படி , இளைஞர் விளையாட்டுகளை விளையாடும் குழந்தைகள் பெரும்பாலும் அதிக சுயமரியாதை மற்றும் அவர்களைப் போன்ற சக வயது குழந்தைகளை விட குறைவான கவலை மற்றும் மனச்சோர்வைக் கொண்டுள்ளனர். குழு விளையாட்டுகள் குறிப்பாக உடல் செயல்பாடுகளை சமூக வளர்ச்சியுடன் கலப்பதன் மூலம் மன ஆரோக்கியத்தை மேம்படுத்துகின்றன .

இருப்பினும், நிபுணர்கள் குழந்தைகளுக்கான கட்டமைக்கப்பட்ட மற்றும் கட்டமைக்கப்படாத விளையாட்டின் ஆரோக்கியமான கலவையை அடிக்கடி பரிந்துரைக்கின்றனர் : இவை அதிக கற்றலை வழங்க முடியும். அதே சமயம் படைப்பாற்றல் மற்றும் சுய ஊக்கத்தை வளர்க்கவும் உதவக்கூடும் 

.புத்தகங்கள் மற்றும் வீடியோ கேம்கள்

வாசிப்பு மற்றும் குழந்தைகள் செலவழிக்கும் திரை நேரத்தைப் பற்றிய ஆய்வின் கண்டுபிடிப்புகள் ஆச்சரியத்தை அளிக்கின்றன.

இந்த ஆண்டின் தொடக்கத்தில் கேம்பிரிட்ஜ் பல்கலைக்கழக ஆய்வில் கண்டறியப்பட்டது என்னவெனில், மகிழ்ச்சிக்காக வாசிப்பது, குழந்தைகளின் சிறந்த மனநலம், படைப்பாற்றல் மற்றும் பகுத்தறியும் திறன் ஆகியவற்றை வளர்க்கிறது. 

சின்சினாட்டி குழந்தைகள் மருத்துவமனையில் நடத்தப்பட்ட கடந்தகால ஆய்வுகளின்படி , அதிக நேரம் படிக்கும் குழந்தைகள், திரை நேரத்துடன் இருக்கும் குழந்தைகளை விட அறிவாற்றல் சோதனைகளில் அதிக மதிப்பெண் பெறுகிறார்கள் .

வீடியோ கேம்கள் அனைத்தும் கெடுதலா..?

ஆன்லைன் கேம்கள் முற்றிலும் மோசமான செயல்பாடு அல்ல. வீடியோ கேம்கள் குழந்தைகளின் வளர்ச்சி, நினைவாற்றல், இடஞ்சார்ந்த விழிப்புணர்வு மற்றும் சமூக திறன்களுக்கு சில நன்மைகளை வழங்குகின்றன என்று அமெரிக்க உளவியல் சங்கம் கூறுகிறது. ஆனால் குழந்தையின் திரை நேரம் முற்றிலும் மேற்பார்வை செய்யப்படாமல் இருக்கும் போது அந்த அறிவாற்றல் வளர்ச்சி தடைபடுகிறது.

உங்கள் குழந்தைகளை வீடியோ கேம்களில் குறைவாகவும், புத்தகங்கள் அல்லது விளையாட்டுகளில் அதிக நேரத்தையும் செலவிடுவதை எப்படி ஊக்குவிப்பது என்பது உங்களுக்குத் தெரியாவிட்டால், மென்மையான மற்றும் வெளிப்படையான அணுகுமுறையை மேற்கொள்ளுங்கள் என்று நிபுணர்கள் கூறுகின்றனர்.

இறுதியாக ஒருவார்த்தை..!

கவனிக்கப்படாத நிலத்தில் ஏதோ ஒன்று முளைக்கிறது. அதுவே களை என்று அழைக்கப்படுகிறது. கவனிக்கப்படாத எதுவும் தன் நிலை மாறும், கெடும், அழியும். இது உலக நியதி. நம் குழந்தைகளை நாம் கூர்ந்து கவனிக்கும்போது மட்டுமே நம்மால் அவர்கள் செல்லும் திசையை அறிய முடியும். அதற்கு முதலில் எது சரி தவறென்ற அறிவு பெரியவர்களான நமக்கு வேண்டும். 

குப்பை உணவுகளைத் தவிர்த்து, பரந்த விளையாட்டுத் திடல்களில் பிள்ளைகளை விளையாட அனுமதித்து, ஊக்குவித்து, அவர்கள் செல்போன் மற்றும் கணினித் திரைகளில் செலவிடும் நேரத்தை குறைக்கும்போது அப்பிள்ளைகள் ஒரு தரமான வாழ்க்கையை வாழத்தொடங்குவார்கள். இதில் பெற்றோர்களின் நேரமே முக்கியமான கச்சாப்பொருள் என்பது இங்கே கவனிக்கப்பட வேண்டிய ஒன்றாகும்.